Dr Pythagoras vo Samos (altgriech. Πυθαγόρας) (* um 570 v. d. Z. uf Samos; † noch 510 v. d. Z. z Metapont in dr Basilicata) isch en antike griechische Filosoof (Vorsokratiker) gsi und dr Gründer von ere iiflussriiche religiös-filosofische Beweegig. Won er vierzgi gsi isch, het er sini griechischi Häimet verloo und isch uf Süditalie usgwanderet. Dört het er e Schuel gründet und isch au politisch däätig gsi. Er ghöört au hüte no zu de rätselhaftiste Persönligkäite vo dr Antike. Mänggi Historiker zele en zu de Pionier vo dr griechische Filosofii, vo dr Mathematik und dr Naturwüsseschaft, anderi mäine, er sig vor Allem oder nume e Verkünder vo religiöse Leere gsi. Es isch mööglig, ass er die Beriich het chönne verbinde. D Pythagoreer, wo si Naame witerdräit häi, si au noch sim Dood kulturgschichtlig bedütsam bliibe.
Bekannt worde isch v. a. siin Pythagoras-Satz.